(تزوير
في أوراق رسمية)
قبل فترة طلب
مني صديق خدمة ما. ذهبت للجهة المعنية التي حولتني للرئاسة بخطاب. حملت الخطاب
وذهبت الى الرئاسة المفترض انها توقع عليهو
وتخلص الاجراء (والخطاب نفسو لمن قريتو ما
فيهو ولا جملة واحدة مركبة صاح واخطاء نحوية في جملة فيها جمع مذكر سالم ده اولاً تانياً الخطاب ماعندو اي معني يعني وجودو
وعدمو واحد). الموظفة لبست النظارة وقالت
لي :(لازم تمشي ام درمان لي --------------------------- عشان يوقع ليك هنا بعد داك
جيب لي الخطاب). اعتذرت لها لعدم معرفتي بالاجراءات وشكرتها وغادرت الى ام درمان للشخص
المعني للتوقيع بكل حسن نية وطيب خاطر وانا اعتز بالموظفة التي تتبع الاجراءات الرسمية.
دلفت الى مكتب فلان ونقلت له طلب الموظفة بتوقيعه هنا. رفع حاجبيه مستغربا ونادي موظفة
اخرى :(تعالي شوفي البلاوي البتجينا من الرئاسة - الكلام ده مش اختصاصهم - انا اوقع
هنا بي وصفي شنو يعني). فلانة النادوها دي قالت لي (انت متأكد ناس الرئاسة قالوا ليك
كده). قلت (وقبل نص ساعة كمان وممكن تتصلوا عليهم وتسألوهم – في اختراع اسمو التلفون
بحلوا بيهو الحاجات الزي دي ). قالت (لالا ارجع ليهم قول ليهم ده ما اختصاصنا - توقيعك
انتي بس بكفي). حسيت انو (ام نظارات) ديك حا ترجعني ل (فلان
وفلانة) ديل تاني . بعد الخروج منهم قلبت ارقام
هاتفي لعلي اجد صديقا يتبع لتلك المؤسسة. وجدته فعلا وحكيت له القصة . ضحك ثم قال
(يازول الناس دي كلها دايشة مافي زول عارف صلاحياتو ولا اختصاصاتو وبعدين من حكايتك
شكلو في حساسيات بين الرئاسة والفرع) قلت : ( حساسيات بين الرئاسة والفرع ؟؟؟؟ وانا
دخلي شنو بالحساسيات بين الرئاسة والفرع ان شاء الله ما يتصالحوا لي يوم الدين –
يتحاسسوا بعيد من العملاء ) ثم اضفت : ( طيب والحل شنو) . ضحك ثم قال (شهر شهرين جري بين الرئاسة والفرع يمكن تتحل) قلت
:(شهر شهرين ؟؟؟؟ في خطااااااااااااااااب – ههههههههههههههههههههههه - ده لعب ده –
انا مسافر وما فاضي للجرجرة دي). قال (اتصرف طيب).. قلت (اتصرف كيف يعني ). قال
(انت مابتفهم) ثم ضحك واغلق الهاتف. اتذكرت الدفاع الشعبي المشيناهو بالغصب عشان
ندخل الجامعة . عبارة (اتصرف دي ) ذكرتني الايام اياها وكيف كنا (بنقد السلك ) ونمشي
السينما (بالصلعة والدمورية) وبعدها نتعشى (كوارع) في سوق الدويم – الله يجازيكم .
المهم قعدت عند ست شاي - شربت كباية شاي وكباية
جنزبيل وطلعت قلمي ووقعت بالانابة عن بتاع ام درمان واضفت حرف ع/------ والتي تعني (عنه) ، اضفتها احتياطاً واضعاً في
الحسبان احتمال ان تكون (ام نظارات) حافظة توقيع (فلان وفلانة) بتوع ام درمان ديلك
واحساسي من نظرات (ام نظارات) قال لي انها
ماعارفة أي شي دايرة تتعكلت بس وثانياً ع/------------------- دي بتحميني حال انكشاف امري (يعني لو سألتني ده
منو الوقع ده ) اقول ليها زي ما قال عادل امام (واحد كده ابيض وطويل وباستك من فوق
– لقيتو في مكتب المدير- بعد داك هي والمدير يفتشوا الوقع ده منو ) يلا. ماعلينا. بعد التوقيع ذهبت الى الموظفة وسلمتها الخطاب. وضعت
نظارتها مرة اخرى وقالت بظفر (كده تمام). ثم وجهت باكمال الاجراءات ووضعت توقيعها
تحت توقيعي. (يعني انتو بيناتكم حساسيات انا ذنبي شنو اقضي نهاري كلو بين ام درمان
والخرطوم – بتلعبو لعب). هههههههههههههههههههههههههه (تزوير في اوراق رسمية ) ده اسم
فيلم للراحل احمد زكي.
* نصيحة: ما تجربوا الحاجة دي لسببين اولاً (انا عندي ضرورة دعتني لهذا
التصرف ) وثانيا (ما كل مرة تسلم الجرة ).
0 التعليقات:
إرسال تعليق