بالبلدى الفصيح

         تعالوا اقول ليكم كلام . حقو كل واحد مننا يزرع ليهو تلاته اربعه شجرات قدام خشم البيت . قنايتين و نملية  - بالبلدى كده – بعملن سياج من غنمايات حاجة بخيتة و تيس السرة بت شيخ الحلة .

    اها ، تعالوا تانى بعد تلاته اربعه سنين وشوفوا المشهد . بقينا نقعد تحت ضل النيمتين و دقن الباشا الزرعناهن قدام خشم البيت .

        الغبار – فى حلتنا – قل شديد . ناس الازمة والحساسية ارتاحوا شديد . حاج العوض بتاع التاكسى الهنتر ارتاح من قومة نص الليل للمستشفى عشان الاوكسجين للطريفى ود حاج الخضر . هو الاوكسجين زاتو اليومين دى فى ؟؟

        مجلس الحلة قرر اجتماع بعد صلاة الجمعة . الخواجات وصلوا بدرى قبل زمن الاجتماع عشان يتأكدوا قالوا . عربيتين لاند كروزر مظللات و معاهم عربيتين بوليس واحده قدام و التانية ورا . الخواجات نزلوا . واحد بى طاقية والتانى بى برمودا و التالتة خواجية بالبنطلون . بنوتنا حردن الاجتماع محتجات عشان الخواجية البتقعد وسط الرجال و تشرب المارلبورو .

         فى الاجتماع ، المجلس والخواجات كانوا فى المنصة الرئيسية وقصادهم اعيان الحلة ، الموظفين ، ناس السكة حديد ، ناس الشفخانة ، اصحاب الكناتين و آخر صف الشفع و الحريم .

        مجلس الحلة – ومن ضل الشجرات الزرعناهن – اعلن حلتنا منطقة خالية من الحر و الغبار و الازمة .

         ناس البى بى سى و السى ان ان والجزيرة نقلوا الاعلان على الهواء . التلفزيون السودانى سجلوا وقال بعملوهو سهرة فى عيد رمضان ( عييييييييييك يموتوا ناس و يحيوا ناس ) . البلولة – المساعد الطبى بتاع شفخانة الحلة – ابرق الخرطوم عبر التلغراف ( من الليلة ما دايرين اوكسجين ولا فانتولين ) . طبعاً ناس الوزارة اتكيفوا .

         خريجو الزراعة و الغابات فى حلتنا دايرين ينقلوا التجربة دى لى زملائهم بالكلية . ناس البيطرة كمان دايرين يشوفوا حل لى غنمايات حاجة بخيتة . اختراع جديد . والكلام ده مقصود بيهو اكتر ناس المناطق الطرفية لانو الاحزمة الخضراء بتشتغل مصدات رياح . بالمناسبة احمد الله انى ( طرفى ) و لست ( متطرف ) . و الطرف فى حاجة سمح . تعالوا نزرع بلدنا.

شاركه على جوجل بلس

عن حمدى صلاح الدين